إسلاميكا
welcome to my forum , please sing up now .


انضم إلى المنتدى ، فالأمر سريع وسهل

إسلاميكا
welcome to my forum , please sing up now .
إسلاميكا
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

أسره ديمقراطيه جدا ً

اذهب الى الأسفل

فن أسره ديمقراطيه جدا ً

مُساهمة من طرف إسلاميكا الإثنين 5 أكتوبر - 21:52:41

أسره ديمقراطيه جدا ً

أسره ديمقراطيه جدا ً 9631_1225636768718_1462983895_30659229_1566638_n

الان نرى العالم يتحدث وبصوره كبيره عن الديمقراطيه وعن حقوق الانسان وحريته وعن تطبيق هذا كله ، ولكن هل هذا كلام فقط وان ما يتم فى هذه البلاد هو أبعد ما يكون عن الديمقراطيه ام انه الديمقراطيه الحقيقيه .

حتي لا نتسأل كثيرا ً بدون جدوي دعونا نتعرف علي حقيقية الديمقراطيه من خلال حسام وأسرته .

حسام هو تجسيد حي لوضع مصر الحالي ووضع دول كثيره مثلها ، وانتقالها من النظام الدكتاتوري الي النظام الديمقراطي ، لذلك دعونا نتعرف علي حسام وعلي طريقه تعامله مع اسرته في دكتاتوريته ، ونتعرف معا ً علي الاسباب التي دفعته لتغير سياسته وما هي سياسه الديمقراطيه التي اتبعها ...

تبدأ احداث قصتنا مع عوده حسام الى منزله وهو فى حاله لا يرثي لها ، وذلك لمعرفته بالشجار الذى سيدور بينه وبين زوجته مريم ، ذلك الشجار الذي بدأ منذ سنوات ولم ينتهي حتي الأن ...

مريم : انت جيت يا حسام ؟

حسام : ايوة جيت ، اومال خيالي الي جه ! عملت أكل ؟

مريم : حاضر ثوانى وهطلعوا على السفره .

وبعد الأكل ...

حسام : اعمل ِ بقي كوبايه شاي .

مريم : شاي كمان انا زهقت بقى من الحكاية ديه ، مش معقول كل حاجه علي !

حسام : انتِ بتبرطم ِ تقول ِ ايه ؟

مريم : مش معقول كل حاجه انا الى اعملها فى البيت وانت ترجع كل يوم من الشغل تقعد تتفرج على التلفزيون وبعدين تنام .

حسام : اومال انا الي هعمل شغل البيت ولا ايه يا مدام ! ده الي ناقص كمان الرجاله تقف في المطبخ وتقعد تحضر الأكل .

مريم : وفيها ايه لما تساعدنى فى المطبخ ، هو حرام انك تساعد مراتك في شغل البيت !

حسام : ايوة طبعا ً حرام ، لأما يكون حيلي مهدود طول اليوم في الشغل عشان اجيبلكوا الاكل ، وأما ارجع اعمل الاكل كمان . ده يبقي افتري .

مريم : انا ما قولتش اول ما ترجع ، بعد ما تاكل وتستريح شويه .

حسام : طيب ولما انا الي اعمل الأكل انتِ هتكون لزمتك ايه ؟ ولا انا هخدم عليك يا هانم !

أسره ديمقراطيه جدا ً 9631_1223971327083_1462983895_30652680_8335366_n

مريم : والله انت متجوزني خدامه اطبخ وامسح واكنس ولا ايه ؟! الجواز شركه بين شخصين ، مش شخص يتحكم في الشخص التاني .

حسام : طيب ما هو عشان شركه انا بعمل الي علي في الشغل ، وانتِ المفروض تعمل ِ الي عليك في البيت .

مريم : طبعا ً ما انت مش حاسس باى حاجه ، انت ليك شغلانه واحده فى الشغل وانا من حقى يبقى ليا حاجه واحده .

حسام : انتِ فاكره ان الشغلانه ديه بالساهل ده انا بيطلع عيني عشان اجيبلوكم القرش ، وانتِ هنا قاعده طول اليوم جنب التلفزيون وتحت المروحه ومش حاسه بحاجة .

مريم : وانا هنا بيطلع عينى عشان اربيلك الاولاد ويطلعوا كويسين ، اولادك يا بيه الي ما تعرفش عنهم حاجة ، ولا بتتكلم معاهم خالص .

حسام : انتِ عشان بتعمل الأكل وتوضب ِ الشقة تنكدي علي كل يوم ، وتقعد ِ تقول ما انا بتعب في تربية الأولاد ، انا مش ناقص صداع أكتر من كده انا هدخل انام .

مريم : ده المتوقع ، اخر الحوار بيكون كده .

حسام : اعملك ايه بس ما انتِ اما بتصدق ِ ارجع من الشغل وتقعد ِ تشغل الاسطوانه المشروخه بتاعت كل يوم .

مريم : نفسى تحس بيه شويه وتحاول تتغير .

حسام : انا برده الي اتغير ! بطل ِ تسمع لأمك شويه وركز ِ في تربية ولادك .

مريم : انت الي ركز شويه مع ولادك .

أسره ديمقراطيه جدا ً 9631_1225641168828_1462983895_30659233_7986122_n

ترك حسام زوجته مريم تتحدث وذهب للنوم ، وفي اليوم التالي ذهب حسام الي عمله وترتسم علي ملامحه الكائبه الشديدة ولاحظ صديقه عُدى هذا ...

عُدى : مالك يا حسام كل يوم تيجى زعلان ليه وباين عليك مضايق أوي ؟

حسام : مراتي يا سيدي ! كل يوم تنكد علي ، وكل يوم تقولي انت مش بتساعدني في البيت وبترجع تنام وما بتعملش حاجه معايا في الشقة .

عُدى : ليه كده ؟

حسام : ما اعرفش ! انا زهقت بجد منها ومن الحياة كلها .

عُدى : للدرجه دى ، هدى نفسك انت بس ، واكيد هتلاقى حل .

حسام : حل ايه بس ! انا كل اما اقولها علي حاجة ما بتنفذهاش ، ودماغها متربسه ما بتسمعش غير نفسها ، بتضطرني ساعات اني اضربها .

عُدى : لاء غلط عمر ما العنف كان الحل ، ده بالعكس هتعند أكتر معاك ، انت بس حاول تخدها علي قد عقلها ، وتحسسها انك بتنفذ كلامها بس في الحقيقية انت بتنفذ كلامك .

حسام : يعني اعيشها الوهم .

عُدى : اة بالضبط ، وجرب ومش هتخسر حاجه .

حسام : بس انت عارف ان الحكاية ما نفعتش هعمل فيك ايه ؟

عُدى : جرب وما تخفش يا عم .

حسام : ماشي هجرب .

أسره ديمقراطيه جدا ً 9631_1225646528962_1462983895_30659250_6201592_n

وفور عوده حسام الي المنزل بدأ في تنفيذ أقتراح عُدى ...

حسام : مريم ، انتِ لسه زعلانه ؟

مريم : من ايه ولا ايه بس !

حسام : انا عارف اني زعلتك كتير ، بس ده غصب عني عشان ضغط الشغل علي كبير أوي .

مريم : انا كل الى نفسى فيه انك تقعد مع الاولاد وتعرف حياتهم ماشيه ازاى ، وتقعد تتكلم معاهم مش يا دوب كل صلتك بيهم الفلوس وبس .

حسام : ماشي ان شاء الله هقعد معاهم ومعاك يا جميل .

مريم : ياريت . بس يا تري ايه سر التغير المفاجئ ده ؟

حسام : أصل انا بعد اما خلصت الشغل النهارده وانا فى طريقى للبيت شوفت المطعم الى اتقابلنا فيه اول يوم ، وافتكرت ذكرياتنا والايام الجميله الي قضينها مع بعض ، واتمنيت ان الايام دى ترجع تانى .

مريم : يااااه ، يا حسام كانت ايام جميله ، تفتكر انها هترجع تاني ؟

حسام : ان شاء الله هترجع تاني ، انا بس الفترة الي فاتت كنت مقصر أوي معاك ، بس انتِ عارفه ان ضغط الشغل علي شديد . بس انا عارف انك مالكيش اي ذنب ، وعارف انك استحملت ِ كتير ، بس ربنا يقدرنى واقدر اعوضك.

مريم : وانا عارفه اني انا كمان كنت مقصره معاك ، وكنت علي طول بضغط عليك وبحملك اكتر من طقتك ، بس ده كان من عشمي فيك .

حسام : انا عارف يا حبيبتي ، وان شاء الله الايام ديه مش هترجع تاني ، ونقضي باقيه حياتنا في سعاده .

مريم : ان شاء الله يا حبيبى هتبقى ايامنا كلها سعاده .

وشعر حسام ومريم في ذلك اليوم بسعاده افتقدوها لسنوات كثيرة . وذهب حسام في اليوم التالي سعيدا ً الي زميله عُدى يبشره بنجاح اقتراحه .

أسره ديمقراطيه جدا ً 9631_1224078969774_1462983895_30653092_7111530_n

عُدى : شكلك مبسوط النهارده يا حسام ، شكل طريقتى نجحت ، صح ؟

حسام : ايوة ، ياااة ده انت عبقري ، كان فينك من زمان ! من فترة كبيرة ما حستيش بالسعاده الي حستها امبارح .

عُدى : اى خدمه عشان تعرف بس معزتك عندى .

حسام : الله يخليك يا عُدى .

عُدى : اة صحيح في حاجة انا نسيت اقولك عليها المرة الي فاتت .

حسام : ايه هي ؟

عُدى : انك لازم تحقق لها اى حاجه من الى قولتها عشان ما تحسش انك بتاع كلام وبس وترجع تعند معاك من تاني .

حسام : ماشي انا هجرب ومتأكد ان التجربة هتجيب نتيجة ان شاء الله زي المرة الي فاتت .

عُدى : ابقى قولى ايه اخبارك ، ولا اقولك اكيد هيبان مش شكلك .

حسام : اكيد هقولك يا جميل .

عندما عاد حسام الي البيت حاول ان يجد شئ ليقوم به لكي تعلم زوجته انه لا يتكلم فقط ولكن يعمل ما يقوله ، ولكنه وجد ان كل شئ مرتب والطعام معد . فجلس علي الكرسي وهو يفكر ماذا يفعل ، واثناء تفكيره وجد ابنه الاكبر يدخل من باب الشقة ، فتذكر ما قالته زوجته له وحثها الدائم له علي التقرب من الأولاد ، ففكر ان ينفذ الخطه التي اقترحها عليه عُدى مع ابنه الكبير شهاب .

أسره ديمقراطيه جدا ً 9631_1223970967074_1462983895_30652676_3843037_n

فلما دخل شهاب علي والده وألقي عليه السلام ثم اتجه الي حجرته ، نادي عليه حسام ...

حسام : تعاله يا شهاب ان عاوز اتكلم معاك شويه .

شهاب : في حاجه يا بابا ؟

حسام : عاوز اتكلم معاك شويه عشان بقالي فترة كبيرة ما اتكلمتش معاك . تعالي اقعد جنبي .

شهاب : حاضر يا بابا ، خير كنت عاوز حاجه ؟

حسام : ايوه كنت عاوز اشوف احولك في الجامعة ، واعرف انت عامل فيها ايه .

شهاب : الحمد لله ماشى فيها زى كل سنه .

حسام : طيب الحمد لله ، واخبار محاضراتك ايه ؟

شهاب : كويسه بحاول انتظم فيها .

حسام : بتحاول ؟ ليه هو انت فيه حاجة شغلاك الايام ديه عن المحاضرات ؟

شهاب : بصراحه اة .

حسام : وايه بقي الي شغلك عن الدراسه ؟

شهاب : أتكلم معاك بصراحه ، ولا هتتخانق معايا وتزعق لي زي كل مرة .

حسام : لاء ما تخافش يا شهاب ، ده كان زمان ، وانت مهما قولت دلوقتي انا مش هضايق ولا هتنرفز ، لأنك ابني وانا بحبك وانت سندي في الحياة ، وانا اما كنت بتخانق معاك في ده كان من خوفي عليك مش أكتر ، بس انا دلوقتي اتغيرت وعرفت ان عمر الخناق ما بيجيب نتيجه ، فاتكلم يا بني وما تخافش .

[center][center]أسره ديمقراطيه جدا ً 9631_1225659369283_1462983895_30659259_3833451_n

شهاب : ماشي يا بابا هتكلم ومش هخاف ، هو انا بصراحه بحب بنت أوي ونفسي أتجوزها بس ده طبعا ً بعد موافقتك .

شعر حسام انه سوف يفقد اعصابه فلم يعرف ماذا يقول او يفعل لاقناع ابنه بترك هذه الفتاه ، ولكنه تمالك نفسه سريعا ً بعد ان خطرت بباله خطه ماكره يستطيع بها ان يبعد ابنه عن تلك الفتاه ...

حسام : اة قولت لي بقي ، هو ده الموضوع الي شغلك عن الدراسه .
شهاب : اة وما كنتش عارف اكلمك فيه قبل كده .

حسام : اة ، وهي بقي تبقي زميلتك في الجامعه ؟

شهاب : اة معايا فى السكشن .

حسام : اة ، وهي كمان بتحبك وصرحت لك بحبها ولا لاء ؟

شهاب : اة بعد ما انا قولت لها .

حسام : واهلها يعرفوا ؟

شهاب : هي كانت عاوزه تقولهم بس انا رفضت وقولت اما اقولك الاول وتوافق ان اروح أطلبها منهم ، وانا كده كده ناقص لى سنه واتخرج وعاوز بعد اما اتخرج اخطبها ، ايه رائيك ؟

حسام : قبل اما اقولك رأيي عاوز اسألك الاول شويه اسئله .
شهاب : اتفضل يا بابا .

حسام : انت تعرفها من امتي ؟

شهاب : من سنتين . بس من سنه ارتبطنا ببعض وقولت لها انى بحبها .

حسام : طيب بنت تعرف من ورا أهلها شاب وتمشي معه لمده سنتين ، وموافقه انها تمشي مع الشاب ده لغايه اما تتخطب ، مش ممكن تمشي من ورا زوجها بعد اما تتجوز مع راجل تاني ؟

شهاب : ما انا قولت لك انها كانت عاوزه تقولهم بس انا الي رفضت عشان قولت اما اقولك الأول .

حسام : يعني هي اقترحت عليك انها تقولهم امتي ؟

شهاب : لما قولت لها انى عاوز اتجوزها .

حسام : يا راجل وانا اعرف انت قولت لها امتي !

شهاب : من 9 شهور .

أسره ديمقراطيه جدا ً 9631_1223970967074_1462983895_30652676_3843037_n

حسام : يعني بعد سنه وشهر من تعرفك عليها ، سنه وشهر مش بتقول لأهلها وضميرها مره واحده صحي . ديه فترة كبير أوي تخلي الواحد يخاف . ده الواحد بيخاف ان ضميره ينام ثانيه فما بالك بواحده ضميرها نام سنه .

شهاب : يعنى فى الاول هتروح تقولهم ايه ! انا بعرف واحد زميلى فى القسم ! انا كنت بالنسبه ليها زميل زى اى واحد فى القسم ، انت عاوز تطلع فيها عيب وخلاص !

حسام : بص يا ابني انا مش عاوز اطلع فيها عيب لأن العيب واضح . يعني بزمتك ازاي هتكونوا اصحاب عادي وهتعرض عليها الزواج !

شهاب : ما هو بعد ما حسيت انها كويسه انا قربت منها وصارحتها بحبى .

حسام : اة قربت منها وعرفت كل تفاصيل حياتها وقولت لها بحبك ، وكل ده وتقوليِ اصحاب عادي .

شهاب : اة وفيها ايه !

حسام : وفيها ايه ! اة . فيها انك زي اما قربت لها بحجه الصداقه ممكن يقرب لها واحد تاني وتالت . انت يا ابني مش عايش في الدنيا ولا ايه !
فيه بنات تمشي معاها وفي بنات تتجوزها . خليك مفتح وناصح ، وما يضحكش عليك بسهوله .

شهاب : يعنى معنى كده ان كل بنت تفضل فى حالها وما تكلمش اى حد ! ويبقى الجواز جواز صالونات . يا بابا الكلام ده قديم قوى ، انت الى مش عايش فى الدنيا .

عندما سمع حسام كلام شهاب شعر بأهانه بالغه وجهت اليه ، وشعر بأنه تساهل جدا ً مع شهاب ، وانه لا بديل عن الدكتاتوريه لحل تلك المشاكل ، ولكنه تذكر كلام عُدى . فقرر ان يكمل الحديث ، ويصبر حتي ينال مراده في النهاية ...

حسام : انت فهمتني غلط ، انا ما قولتش كده ، هي ان محترمه بجد هتكون عمله حدود بينها وبين صاحبها ، مش تقعد تتكلم مع ده وتهزر وتحكي قصه حياتها مع ده ، وبعد كده تقول ِ ايه يعني ما احنا اصحاب . طيب انا هسألك سؤال ونشوف كلامي قديم ولا حديث .

شهاب : ماشى .

حسام : ترضي ان الي هتتجوزها تكون مصاحبه واحد ؟

شهاب : يعنى ايه مصاحبه واحد ! انت ناسى ان احنا فى كليات مشتركه ، يعنى اكيد هى فى شله وفيها ولاد وبنات .

حسام : انا اقصد يعني بعد اما تتجوزوا تتكلم مع واحد زميلها في التليفون او تقبله ؟

شهاب : لاء طبعا . هى بره الجامعه مش بتكلم حد .

حسام : يعني اما هي تكون في الشغل و تعرف رجاله فهل تقبل انها تقعد تكلمهم عن حياته وكده ؟ او حتي هي في الجامعه ترضي انها تقعد تتكلم مع الشباب عن حياتها وتقرب منهم ؟

شهاب : لاء طبعا .

حسام : طيب قدام ان الصداقه انت شايف انها عاديه ، ليه ما بتوافقش عليها دلوقتي ؟ ولا انت مره تقول مالها ومره ترفضها . ده مش منطق خالص لازم تكون محدد لأما موافق لأما رافض .

شهاب : انا موافق انها تكلم زمايلها فى الشغل عن الشغل والدراسه بس اكيد مش هقبل تكلم حد بره الشغل .

حسام : بس هي اما كانت بتتكلم معاك ما كنتش بتتكلم عن الشغل والدراسه ، فأيش ضمنك انها هتكلمهم في الشغل والدراسه ؟

شهاب : أمممم .

حسام : انا هسيبك تفكر مع نفسك وادخل انام عشان عندي شغل الصبح ، تصبح علي خير .

شهاب : وانت من أهل الخير يا بابا .

وعندما ذهب حسام لينام وجد زوجته لا تزال مستيقظه ...

مريم : انت كل ده كنت بتتكلم مع ابنك ، مش عادتك يعني .

حسام : انا قولت اعمل الي انتِ قولت لي عليه .

مريم : طيب ، وكنتم بتتكلموا في ايه بقي ؟

حسام : اما تكبر ِ هقولك .

فضحكت مريم وضمته اليها وهي في غاية السعاده بتصرفات زوجها ...

مريم : يا ريت تبقي تشوف ابنك التاني خالد عشان بقاله فتره زعلان ومش راضي يحكي لي هو زعلان من ايه .

حسام : بكره ان شاء الله ابقى اكلمه .

وفي اليوم التالي أتجه حسام الي ابنه خالد ليتحدث معه ليعرف ما هو سر حزنه هذه الايام ...

حسام : مالك يا بطل فيك ايه ؟ أمك بتقولي انك متضايق بقالك كام يوم ومش راضي تقولها في ايه ، ايه بتحب واحده ومش معبراك ولا ايه ؟

أسره ديمقراطيه جدا ً 9631_1223971247081_1462983895_30652678_1193037_n

خالد : احب ايه يا بابا هو انا فايق !

حسام : اومال في ايه ؟

خالد : ما فيش . الكليه مش حلوه وعاوز احول منها .

أصيب حسام الجنون ، فالكلية التي يريد خالد ان يتركها الأن هي الكليه التي حدثت مشكله كبيرة بسببها منذ سنه ، فقد كان حسام رافضا ً دخول خالد تلك الكلية ، ولكن حسام وافق علي دخول الكلية بعد ضغوط شديده عليه ، والان يريد خالد ان يتركها بكل سهوله ، ماذا يفعل حسام مع هذا الموقف الصعب ! أيوافق علي تغير الكليه ويفقد حسام قيادته لخالد ، ويصبح خالد هو المتحكم الوحيد في حياته ؟ اما يرفض حسام ليعلم خالد انه لازال المسيطر الوحيد علي الأسره ؟ لنري معا ً ماذا فعل ...

حسام : مش ديه الكلية الي كنت بتحبها ، دلوقتي عاوز تحول منها !

خالد : بس لما دخلتها الدراسه فيها مش حلوه خالص والدكاتره مش عندهم تفاهم خالص .

حسام : انت شكلك شديت مع دكتور ، صح ؟

خالد : لاء بس فى حاجه مش فاهمه فقولت للدكتور فزعقلي وعمل مشكله ، وقالى انا مش بعيد حاجه انا شرحتها ، وبعدين الدكتور قالى لو مش فاهم حاجه تعالى وانا ممكن اديك درس وهشرحلك كل حاجه .

حسام : طيب بص انا هقولك علي حاجه هتفديك جدا ً في الحياة . ما تخليش حد يبعدك عن حلمك مهما كان مركز الشخص ده ، يعني مش عشان دكتور بايع ضميره انت تحول من الكليه ، لاء بالعكس ده انت لازم تذاكر اكتر عشان تبقي دكتور وتوريه ازاي انت احسن منه ، وتوريه ازاي يتعامل مع الطلبه ، وبعدين ان هو فاكر نفسه ناصح اطلع انت انصح منه وصور من زميلك الدروس الي هو بيديها .

خالد : بس ...

حسام : بس ايه تاني ؟

خالد : بص اصل انا كنت عاوز أحول كمان عشان زميلي بتوع المدرسة دخلوا كليه تجاره وبيقولوا انه لذيذة وسهله .

حسام : ممكن هم بيقولوا انها لذيذة وسهله عشان هم كانوا بيحبوها ، ولكن انت ان دخلتها وانت مش حاببها هتندم انك حولت ومش هتقدر ترجع لكليتك من تاني ، فركز أحسن لك في كليتك وما تسمعيش كلام اي حد يقولك حول .

خالد : ان شاء الله يا بابا .

وبعد فتره بدأ حسام في حصاد ثمار خططه ...

فبعد حديثه مع شهاب بدأ شهاب يراقب تصرفات حبيبته ، وبدأ يتضايق من اقل شئ تقوم به حتى صارت بينهما مشاكل كثيره أدت في النهايه الى أنفصالهم .

بينما خالد أقتنع بكلام أبيه واستمر في كليته علي الرغم من استمرار الدكتور في مضايقته .

ورغم النجاحات التي حققها حسام في خططه ، وفرحه في بدايه الأمر بأنتصاره علي الصعوبات التي كانت تواجه في بدايه تحوله من الديكتاتوريه الي الديمقراطيه ، الا انه بعد فترة اصبح اكثر حزنا ً من ذي قبل ، ولقد لاحظ عُدى ذلك ...

أسره ديمقراطيه جدا ً 9631_1224078809770_1462983895_30653088_1830158_n

عُدى : مالك يا حسام زعلان ليه دلوقتى ؟ انت مش كنت بتقولي ان الحياة اتغيرت معاك خالص ، وبقيت عايش في نعيم !

حسام : اة ده كان في الأول ، بس دلوقتي بقيت عايش في جحيم .

عُدى : ليه بس ايه الى حصل تانى ؟

حسام : مش قادر استحمل خلاص .

عُدى : ليه بتقول كده ؟ قول لي ايه الي حصل واكيد هنلاقى حل .

حسام : مش قادر أكمل التمثليه الي بعملها علي مراتي واولادي ، مش عاوز استمر في خداعهم . انا كل اما اشوفهم فرحنين بالتغير الي حصل لي قلبي بيتقطع ، لأني عارف اني بأخدعهم .

عُدى : انت مش بتخدعهم انت بتحاول تغير حياتك .

حسام : اغير حياتي ايه بس ! ده كان اكرم لي اني استمر في الديكاتوريه من اني اتحول الي الديمقراطيه الصوريه واخدع مراتي واولادي .

عُدى : انا مش بقيت فاهمك خالص .

حسام : وانا فهمت نفسي خلاص ، ومش محتاج لك تاني .

عُدى : انت حر بس ما تبقاش تيجيلي وتقولي انك زعلان ومخنوق تاني .

حسام : الحزن شئ لا مفر منه في الحياة ، بس انا اقدر اضمن لك اني مش هرجع لك تاني ، لاني قررت ابقي ديمقراطي ، لاني ادركت ان السعاده الحقيقية مش في تنقيذ القرارات ، بل السعاده الحقيقية ان تكون القرارات مفيده ، وان الغرض الرئيسي من الديقراطيه هو الوصول الي اكبر قدر من الحقائق وليس تزيفها .

وفي نهاية الموضوع وجدنا ان المجتمع ملئ بشخصيه حسام الذي يطبق الديمقراطيه بمفهومها الصوري لكي يحقق مصالحه الشخصيه ، ويعلق فرديته في اتخاذ القرارات بالظروف وان الظروف هي التي تضطره لاتخاذ تلك القرارات الفرديه ، وان المحيطون به هم السيئون وهو الملاك الوحيد ، ولكن هل هؤلاء الاشخاص يدركون خطوره ما يقومون به ؟ وهل هؤلاء الاشخاص سيتندمون علي ما فعلوا مثل ما ندم حسام وقرر ان يطبق الديمقراطيه في شكلها الصحيح ؟ نحن نشك في ذلك .

تأليف : Protagonista & ابو تريكة .

أنتاج : أكتوبر 2009 .

مواضيع مشتركه سابقه :

[ندعوك للتسجيل في المنتدى أو التعريف بنفسك لمعاينة هذا الرابط] .

[ندعوك للتسجيل في المنتدى أو التعريف بنفسك لمعاينة هذا الرابط] .


[/center]
[/center]
إسلاميكا
إسلاميكا
admin
admin

عدد المشاركات : 1394
العمر : 34
نقاط : 58644
تاريخ التسجيل : 05/07/2008

https://e6lamica.yoo7.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى