إسلاميكا
welcome to my forum , please sing up now .

الزواج العرفي

اذهب الى الأسفل

cool الزواج العرفي

مُساهمة من طرف إسلاميكا في الجمعة 4 ديسمبر - 15:29:21







رغم معرفه الكثيرون بأضرار الزواج العرفي علي الفرد والمجتمع الا انه المشكله لا تزال مستمره ولا يوجد لها اي علاج الي الأن ، لذلك سنحاول معكم وضع بعض الحلول التي تساعدنا علي التغلب علي تلك المشكله الخطيره .

تبدأ قصتنا في شتاء عام 2008 حينما تحدثت سمر البالغه من العمر ثمانيه عشر عاما ً تليفونيا ً مع صديقتها ريهام البالغه عشرون عاما ً تخبرها انها تود مقابلتها لتخبرها بخبر سعيدا ً جدا ً ، على ان يتقابلا في الجامعه ويتصل من يصل أولا ً بالطرف الأخر ليخبره بمكان تواجده ...


ريهام
: الووووووووو يا سمر انتي فين ؟ انا قصاد بوابه الجامعه اهوه .

سمر
: انا جيالك اهوه ثانيه وحده وهتلاقيني قدامك .

ريهام
: ماشي وانا مستنيه .

وبعد مقابله ريهام لسمر ...

ريهام
: ازيك يا سمر عامله ايه ؟

سمر
: الحمد لله تمام انتي يا بنتي عامله ايه ؟

ريهام
: بخير الحمد لله ، ايه بقي الخبر السعيد الي كلمتيني عنه امبارح ، وقولتلي لازم أشوفك بكره ضروري عشان أقولك عليه ؟

سمر
: انتي فاكره احمد الي حكيتلك عنه قبل كده ؟

ريهام
: اة احمد الطويل ده ، ماله ؟

سمر
: عايز يتجوزني .

ريهام
: تقصدي يخطبك ؟

سمر
: لا يتجوزني .

ريهام
: يتجوزك ازاي ؟ هو لاقي ياكل !

سمر
: ما هو هيتجوزني عرفي .

ريهام
: عرفي ! انتي اتجننتيِ ؟

سمر
: طب اعمل ايه يا ريهام ! انا بحبه اوي وخايفه انه يضيع مني .

ريهام
: والله تقوميِ تتجوزيه عرفي !

سمر
: مفيش حل غير ده يا ريهام .

ريهام
: ازاي يعني ما فيش حل غير كده !

سمر
: انتي مالك بتتكلمي كده ومحموقه مع انك اتجوزتيِ عرفي انتي كمان ؟

ريهام
: اة انا اتجوزت ، بس كانت جوازه منيله خسرت فيها كل حاجه.

سمر
: خسرتيِ فيها ايه يعني ؟

ريهام
: خسرت فيها أيه ! خسرت فيها أهلي ، هم اة كانوا كل يوم يزعقوا لي ويتخنقوا معايا ، وهم السبب الرئيسي أني اتجوز عرفي ، بس خسرتهم وخسرت وقفتهم جنبي . خسرت نفسي وكرمتي أما خليت واحد زي ده يأخذ الي هو عاوزه مني ويرميني رميه الكلاب ، وأما خليت واحد زي ده يعاملني كأني الجاريه بتاعته يقضي معاها ساعه او ساعتين ويرميها بعد اما يزهق منها ، وأما خليته يتعامل معايا كأني بنت لاقيها في الشارع من غير ولا أهل ولا مأوي . خسرت حاجات كتير ولا يمكن اعوض الخساره ديه طول عمري . فأرجوكي ما تخسريِش نفسك زي اما أنا خسرت كده ، انتي لسه علي البر وتقدري تلحقي نفسك .


سمر
: انتي خسرتي كتير اة يا ريهام بس صوبعك مش زي بعض . ومش عشان الحيوان الي انتي أتجوزتيه عمل معاكي كده ، يبقي كل الناس كده مستحيل يا بنتي احمد يعمل معايا كده . ده انتي مش متخيله احمد بيحبيني ازاي وبيخاف علي ازاي ، ده ما يقدرش يقعد ساعتين علي بعض غير اما يطلبني مرة ولا أتنين ، وما يقدرش يعدي يوم الأ لما يشوفني .

ريهام
: لو احمد كان بيحبك بجد ما كنش فكر في يوم انه يتجوزك عرفي حتى لو هيستناكيِ مليون سنه . الي بيحب حد بجد عمره ما هيفكر يشوه صورته قدام الناس ويخليه مش قادر يرفع عينه فيهم

سمر
: ايه الكلام الي انتي بتقوليه ده ! انتي شكلك بتتفرجي علي افلام كتير . فوقي يا بنتي احنا لو ما اتجوزناش دلوقتي مش هنتجوز بعدين ، انتي شايفه حال البلد عامل ازاي . انتي بس بتقوليِ الكلام ده عشان زواجك العرفي فشل ، ولكن ان كان نجح ما كنتيش قلتي انه المفروض يستناني سنتين ولا ساعتين حتي . وبعدين هو ما طلبنيش للزواج العرفي عشان يتعسني ده بالعكس عشان يسعدني بدل الحياة التعيسه الي انا عيشاها ديه .

ريهام
: انتي بتضحكي على ولا على نفسك ! مين قال ان الجواز العرفي بيجب السعاده لحد ؟ مين قال ان اما الواحده اما تكون خايفه ان حد يشوفها مع زوجها تكون سعيده ؟ مين قال ان واحده خايفه ان تصارح اهلها انها متزوجه عرفي تكون سعيده ؟ مين قال ان واحده مهدده بالقتل من والدها اذا عرف بجوازها تكون سعيده ؟ مين قال ان واحده كل يوم تروح شقه شكل عشان تقضي ساعتين مع زوجها تكون سعيده ؟

سمر
: يعني اعمل ايه يعني عشان أحس بالسعاده ! استني عشر سنين لغايه اما اتجوز رسمي ؟

ريهام
: : ايوة طبعا ً تستني عشر سنين والعمر كله كمان . انتي اما تتجوزي عرفي هتضيعي اي حق ليك ، وهتضيعي كرامتك ، وهتضيعي من وجهه أهلك وكل الناس الي حواليكي ساعتها الجواز العرفي هينفعك في ايه ؟

سمر
: أهم معاني الحب هي التضحيه ، وكل اما كانت التضحيه كبيره كل اما كان الحب كبير وعظيم .

ريهام
: تضحيه اة ، شكل احمد عملك غسيل مخ وقدر يسيطر على كل تفكيرك .

سمر
: عملي غسيل مخ ولا ما عمليش ده مش موضوعنا .

ريهام
: اومال ايه موضوعنا يا سمر انك عايزه تضيعي نفسك وخلاص .

سمر
: هو في واحده عاوزه تضيع نفسها ، ده كل الحكايه انه اقنعني بكلامه .

ريهام
: ما هو كل دوره انه يقنعك عشان بس يأخذ منك الي هو عايزه ، وانتي زي العبيطه تمشي وراه .

سمر
: زي العبيطه . شكرا ً جدا ً لكيِ يا ريهام على كلامك ده .

ريهام
: شكرا ً علي ايه يا بنتي ؟ انتي زعلتي ولا ايه ؟ والله ما كنت أقصد ده انا بكلمك كده عشان خايفه عليكي .

سمر
: انا أسفه اني اتصلت بيكي وقلت لازم افرحك ، واني أعتبرتك أقرب اصدقائي .

ريهام
: يا سمر أقعدي انتي زعلتي يا بنتي ليه انا والله ما أقصد .

لم تعرف ريهام ما السبب وراء رحيل سمر المفاجئ ، فقد اعتادا ان ينعتا بعضهما بتلك الألفاظ ايام الجامعه ، ولم تكن تسبب لاي منهما اي ضيق . ولكنها علمت بعد ذلك ان سبب رحيل سمر لم يكون بسبب نعتها بلفظ " العبيطه " ، ولكن لأن سمر لم تجد الحجج العقلية المناسبه لتجيب بها على ريهام فآثرت الرحيل علي استكمال تلك المناقشه الخاسره .

لم يمضي وقت طويل حتى تزوجت سمر من احمد وحدث معها ما نبهتها منه صديقتها ريهام . ندمت سمر كثيرا ً لأنها لم تستمع لصديقتها ولكن بعد فوات الاوان .






المجتمع بآثره يعرف مشكله الزواج العرفي وأسبابه ونتائجه الخطيره علي الفرد والمجتمع ، ولكن تلك المشكله لا يوجد لها اي حل حتي الأن ، وذلك لأن مشكله الزواج العرفي تكمن فينا .

تأليف وأخراج : قلب سندريلا & ابو تريكة .

أنتاج عام : ديسمبر 2009
avatar
إسلاميكا
admin
admin

عدد المشاركات : 1392
العمر : 29
نقاط : 39338
تاريخ التسجيل : 05/07/2008

معاينة صفحة البيانات الشخصي للعضو http://e6lamica.yoo7.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى