هل الفشل طعمه جميل ؟

بسم الله الرحمن الرحيم

السلام عليكم ورحمته وبركاته

احب اعيد السؤال بتاع الموضوع تاني هل الفشل طعمه جميل ؟

اكيد طعمه جميل وجميل جدا ً . الواحد اما بيكون في لحظة فشل يقدر يعرف معادن الناس كويس الي بيحبوه والي بيتكبروا عليه والي بيساعدوه . بس انتم عرفين احسن حاجة في الفشل انك ان فكرت في النجاح هتلاقيه قريب جدا ً ، ففي الليل الوقت الذي يكون الليل فيه شديد الظلمه هو الوقت الذي يسبق الفجر وبزوغ يوم جديد .

انت عارف احسن حاجة في الفشل ايه ؟

انك تبقي عارف ان النجاح مش هيكون ليه طعم الا اذا كان هناك فشل ، فأي حاجة في الكون لازم يكون لها ضد عشان الناس تحس بمعناها .

طيب اذا كان الفشل طعمه جميل فأكيد النجاح طعمه أجمل ؟

ده اكيد طبعا ً والا بقي مفيش حد هينجح ، بس لازم الواحد يفكر هو ليه بيفشل ويظل في الفشل ؟

1 - الفشل يكون نابع من الشخص نفسه :

في بعض الاحيان يشعر الشخص انه فاشل وان ليس له اي أمل في الحياة ، ويلوم الظروف والاجواء المحيطه به علي فشله الذريع .

هذا طبعا ً غير صحيح ، لأن لوم النفس ولوم الظروف لا يؤدي الي النجاح ، بل التحلي بالأرادة القوية والعزيمة والأصرار هم الذين يتنشلون الأنسان من الفشل .

2 - الفشل يكون نابع من الاصدقاء والمحيطين بك :

كتير جدا ً بنقابل أصدقاء يصيبونا بالأحباط ويجعلونا نري الحياة قاتمة اللون ، ويجعلونا لا نري اي شعاع من أشعه الأمل الموجوده في الحياة ...

1 - فمثلا ً عندما تقرر ان تذاكر من بدايه الترم حتي تتميز وتتفوق ، تجد اصحابك يقولون لك : " ياعم نفض انت هتتعب نفسك من دلوقتي ليه ! انت اعمل زينا واشتري مذاكرت في اخر الترم وريح نفسك من التعب ده " .

2 - واما يكون عندك أمل ان تجيب أمتياز في الدراسه ، تجد احد اصدقائك يقول لك : " دول هيضبطونا الترم ده انت شوفت نتيجة السنه الي فاتت كانت عمله ازاي ! " .

3 - واما تكون في أخر سنه بقي وكلك أمل ان تجد عمل بعدما تنتهي من الدراسه ، تجد صديق لك يقول : " هو فيه شغل في البلد ، احنا لازم اما نخلص نبقي ناخد كورسات " . فترد عليه انت وتقول : " طيب ما ناخد من دلوقتي " . يقولك : " يا عم احنا قادرين علي الدراسه عشان نقدر علي الكورس " . وان نفضت لكلامه وروحت تأخذ كورسات ، تلاقيه يقعد يلعب في دماغك لغايه اما تيسب الكورس .

في الحالات ديه مش هأقول لك تحاول تسيب اصحابك لأنك اتدبست فيهم وخلاص ، بس حاول اما يجوا يتكلموا عن الفشل تبتعد عنهم لأنك من غير ما تقصد هتتأثر بيهم .

3 - الفشل يكون نابع من احداث مررت بيها :

في بعض الأحيان يكون الفشل نابع من الظروف التي مررت بها في حياتك ، والمعوقات التي قابلتها في الحياة .

انا هقولك علي حاجه لذيذة جدا ً : " حاول انك اما تيجي تبص علي الماضي يكون لأخذ العبر والدروس منه . وحاول انك تركز علي الحاضر والمستقبل لأن هم دول أملك في الحياة " .

4 - الفشل قد لا يكون لك دخل به :

قد لا تكون السبب في الفشل نتيجة لظلم قد وقع عليك او موقف حدث لك وانت ليس لك به اي دخل او نتيجة للظروف المحيطة بك .

انت تقدر تتغلب علي الحكاية ديه انك تحاول تبعد عن الظروف ديه بأي طريقة كانت ، وتحاول ان ترسم لنفسك مستقبل ملئ بالأحلام والآمال .

الموضوع بتاعي يا جماعة مش موجه عشان تعرف اسباب الفشل وتستمتع بالفشل ولكن عشان تعرف اسباب الفشل وتحاول تتجنبها .

فياريت تنفض كل ده وتزرع في نفسك الأمل طيب ازاي ؟

1 - أنك لا تسمح لأحد ان يحقر رائيك ، فعندما تسمح لأي شخص مهما كان ان يحقر رائيك . فهذا سينعكس بالسلب علي تفكيرك ،وتشعر بعدم نفعك في أي شئ تقوم به ، واذا شعرت بذلك تذكر ان الله خلقك لكي تعمر الارض ، واكيد هتلاقي حاجة بتفهم فيها كويس . وحتي لو انها لا تفيدك الان ، فحاول ان تستفيد بها بأي طريقة ، فهذا سيشعرك بأنك لست فاشلا ً بل ناجح .

2 - في بعض الاحيان اصدقائك يجرحونك ببعض الاقوال ، التي تشعرهم بالسعادة والفخر انهم أفضل منك . ساعتها لازم تكون عارف :

أ - ان هم بيقولوا كده عشان يحسوا انهم كويسين ، وانهم متفوقين علي الناس . بس انا هقولك علي حاجة ، وهي ان اي انسان يقولك انا ناجح ، ويقعد يقولك انت عملت كده ليه ؟ ما عملتش زيي ليه ؟ أعرف انه اكبر الفشلين وحتي ان كان ناجح لن يستمر نجاحه فمن تواضع لله رفعه .

ب - انت ساعات اما حد بيقولك كده ، بيكون نفسك تقوله : " انا احسن منك ليه بتقولي كده ! " . بس ده غلط ، لأن المفروض ان لقيت حد بيجرحك بالكلام كده لازم تسيبه تمشي ، ولكن ان لقيت وسط الكلامه انه بينقدك نقد بناء ، يبقي لازم تقعد عشان تستفيد منه .

3 -حاول انك تعيش الحياة اكنك مش هتموت واعمل للأخرة اكنك هتموت بكرة .

4 - اوجد معني لحياتك وتذكر انك انت الي في ايدك انك تغير حياتك وتمشيها زي ما انت عاوز ، فان عاوز تنجح هتنجح ان شاء الله .

5 - حاول انك تحب الي بتعمله ، وان ما عرفتش جرب حاجة جديدة ، او جرب انك تحبه تاني لا يأس مع الحياة ولا حياة مع اليأس .

6 - اعرف ان مهما كان الظلام موجود هتلاقي نور بعديه فبعد حرب 67 والهزيمة القاسية لمصر استطاع الجيش المصري ان يحقق انتصار ساحق اذهل العالم كله ، فبعد اي هزيمة تحدث الافاقة لكي يصحح الناس مسار حياتهم .

7 - حاول انك تبتسم دائما ً عندما تقابل اي شخص ، فأما الناس هيلاقوك كده هيبتسموا هم كمان . ساعتها بس هتشعر انك ملكت الدنيا بما فيها وتتجدد بداخل الآمال والأحلام .

8 - حاول انك تسمع اغاني تدعوا الي الآمل والسعادة وليس الحزن .

9 - حاول انك تبتعد عن اي معصيه تغضب ربنا فأن المعاصي تفقد الحياة مذاقها .

10 - حاول ان تستيقظ وتصلي صلاة الفجر فهذا سيغير معني حياتك وهقولك ليه :

ا - الهواء الذي يكون في صلاة الفجر يكون نقي جدا ً وعندما تستنشقة سيجعلك منتعش وتقبل علي اي عمل بكل سعادة .

ب - ايضا ً صلاة الفجر تنشط جسدك فهي تعتبر تمرين رائع جدا ً للجسد كله .

ج - ستنقي ذهنك فعندما تركز في الصلاة وتركز تفكيرك عليها وتبتعد عن المشاكل الدنيا ، وتعود مرة أخري لمشاكل الحياة تستطيع بسهولة ان تجد حل لأي مشكلة في العالم في ثواني ، لأن الحل الأمثل لحل اي مشكله هو ان تحاول ان بتعد ذهنك عن اي مؤثرات خارجية .

د - كما انها تخلصك من بعض العادات السيئه ، من ضمنها ان تقوم بالاشياء الجميلة والرائعة امام الناس فقط، ففي صلاة الفجر لا يراك احد الا الله ومن في المسجد . فعندما تقبل علي الله في هذا الوقت انت لا تأمل ان يراك احد فيقول انك مصلي وهذا ينطبق علي كل شوؤن الدنيا .

وفي نهايه الموضوع يتضح لنا ان الفشل مهم جدا ً لكي تنجح فمن الفشل نتعلم ان نكون اقوياء ونحاول النجاح ، اذا ً فالفشل طعمه جميل ولكن لا يحس به الا من يزوق طعم النجاح ، فلا تستلم للحظات الفشل السابقه وحاول ان تكون تلك اللحظات طاقة دافعه لك لكي تنجح .