الكتاب الجامعي

الكتاب الجامعي

مشكلة المشاكل في الجامعة ففي بعض الاحيان يقولون لنا احنا مش ملزمين اننا نعمل كتاب عشان في جميع دول العالم مفيش الكلام ده وبعد كده ينزلوا الكتاب قبل الامتحان بشهر ، واحيان اخره ينزلوه من اول اسبوع ولكن عدد الصفحات من 200 صفحة الي 400 صفحة وانتم عرفين ان الماده بتبقي مقسمه لدكتورين يعني كل ماده كتابين يعني متوسط عدد الصفحات في الماده الواحده من 400 الي 800 صفحة ده ان ماكنتش الماده ممتده يصبح الكتابين 4 كتب وهكذا .

بس مش ديه المشكلة الحقيقة مع ان الحكايه ديه مشكلة بس المشكلة انه فيه كتب مليئة بالاخطاء الاملائية وحتي ان نجيت من فخ الاخطاء الاملائية تلاقي نفسك مش فاهم هو بيقول ايه ، والحكاية ديه حصلت معايا مع كتاب دكتور معين كل الكتاب اخطاء املائية وما فهمتش اي حاجة منه خالص واتجننت من الكتاب ده وندمت اني دفعت فيه 15 جنية من بره الجامعة - عشان الدعم بيخسر الدكاترة فيبيعوا بره الجامعة احسن - وبعدين بقيت اذاكر الماده ديه من كتب تانية واخر ما زهقت روحت جبت مذكرات في الماده .

وحاجة تانية ان فيه كتب الطباعة بتاعتها وحشة جدا ً جدا ً والكلام غير واضح . يعني ضعاف النظر مثلا ً ما يقدروش يقروا الكلام وحتي اللي نظرهم حلو مش هيقدروا برضه يقرؤا عشان الطباعة وحشه جدا ً ، وده غير الكتب المكتوبة باليد .

والحاجة الاخيرة ان فيه دكاترة بتقعد تقول المذكرات منتشرة ليه وهما مش عرفين ان كتبهم هي السبب . يعني واحد مش عارف يقرأ الكتاب من الخط الردئ الموجود فيه هيعمل ايه غير انه يروح يجيب مذكرات .

واخيرا ً كلنا عرفين ان كل حاجة ليها حل وديه بعض المقترحات البسيطة ؟

1 - وضع مواصفات معينه للكتاب الجامعي وألزام الجميع العمل به .

2 - ان يتم عمل لجنه في كل قسم من الاقسام وتكون من رؤساء الاقسام ديه وتكون وظيفتهم مراجعة الكتب طبق للمواصفات التي تم وضعها ، وعدم مراعاه اي اعتبارات شخصية في التقيم .

3 - ان لا يسمح ببيع اي كتاب خارج الجامعة حتي يستفيد اصحاب الدعم الاستفاده الكبري من الكتب .

اخيرا ً انا ما اتقدمتش بالموضوع ده الا وانا متأكد انه ان شاء الله هلاقي ناس من الجامعة قلبها علي الجامعه ويهمها مصلحة الجامعة فوق اي اعتبارات شخصية في القرارات .

ومع خالص الحب والتقدير لكم ;

ابو تريكة .