انا هسافر

انا هسافر

هذه قصة عشتها في فترة من حياتي وجربت فيها معني السفر بجد فحبيت انقلها لكم ، كنت في فترة الاجازة وبعدين زهقت من البيت ، وكان كل تفكيري أني لازم اسيب البيت وامشي أول اما يبقي عندي شقة ، وبعدين كنت عوز حاجات من مكتبة الاسكندرية فقولت خلاص أنا اسافر اسكندرية واروح المكتبه واهو أغير جو ، وبعدين كنت أعرف ناس في اسكندرية وكده ، وقررت أني اسافر من ورا أهلي ، وبعدين نزلت الساعة 6 من البيت وذهبت الي محطة مصر وانا كلي فرح أني هسافر وابعد عن البيت ، وبعدين أول اما وصلت الي الاسكندرية بتصل بزمايلي كل واحد منهم خلع وقال معلش اصل قريبي هنا وكده ، فقولت خلاص أنا أروح المكتبة عشان اشوف الحاجات اللي انا عوزها وسألت عن المكان وبعدين قبل المكتبة فيه شارع طويل كده فيه كلية حقوق اسكندرية ومجمع كليات ، وكانت الساعة حوالي 12 ونص قولت أجيب أكل ، وبعد كده وانا ماشي في الطريق فكرت قولت طيب أنا ان ما رجعتش البيت وقعدت هنا هنام فين ، طيب هل هلاقي شغل بسهولة هنا عشان أقدر اصرف علي نفسي وأكل وكمان حتي ان لقيت شغل ما انا هقعد شهر بدون فلوس لغاية اما اقبض ، وقلت طيب اذا كان ده حالي في مدينة مصرية أومال هيكون حالي ايه أن سفرت بره واللغة غير اللغة وهناك كل واحد همه علي مصلحته ، وكمان طيب انا هنا عشان اشتغلت في الاجازة قدرت اجيب تذكره القطار والمصاريف طيب انا هجيب فلوس الطيارة ازاي ، طيب يبقي كده انا بشتغل عشان اجيب فلوس عشان اسافر اجيب فلوس ، وانا أما اوصل البلد اللي مسافر ليها هيكون احساسي ايه اول اما هنزل المطار ، وأول أما هلاقي تكسيات كتيرة جدا ً منتظرة طيب ان روحت لواحد فيهم هقوله روح فين ولا هسكن فين ولا هلاقي شغل ازاي ، وهستمر ازاي في السفر لأنه لازم يكون عندي اقامة وعمل عشان يستمر مفعول التأشيرة ومايبقاش تذكرة سياحة مدتها 6 شهور بس ، طيب أنا اما اسافر انا هرجع تاني مصر ولا هخلي اولادي يتعلموا بره وانسي أهلي ومصر ، وافتكرت اني لازم عشان اسافر اكون خلصت الجيش كمان ، ولقيت نفسي وسط مشكلة كبيرة لأني أول مرة أفكر في الحكاية ديه بالشكل ده لأني كان اهم حاجة عندي اني اسأفر ومافكرتش في اي حاجة ، وفي النهاية وصلت لمكتبة الاسكندرية ودخلتها وانا راجع بقي للمحطة ركبت موصله غلط وتهت شويه وبعد كده روحت علي المحطة ركبت قطر قعد 6 ساعات ، وفي الأخر رجعت البيت وكنت هضرب في اليوم ده بس ربنا ستر ، بس اتعلمت حاجات كتيرة في اليوم ده .

بعد أن قرأت القصة هل اقتنعت بالمضون ولا لسه عاوز تسافر ؟