الشات بين الولاد والبنات

الشات بين الولاد والبنات

مفيش حد فينا ما عندهوش بنات علي الايميل وانا كنت من الناس ديه

اولا ً هي ايه اساسا ً اهداف الشات بين الولاد والبنات ؟

1 - الجواز ، الخطوبة .

2 - الشهوة وتضيع وقتك .

3 - انك تستفيد في الدراسة بس .

4 - الدراسة واتكلم في الامور الشخصية هو انا هكتم نفسي علي الايميل كمان .

ليه الواحد بيحب يتكلم مع البنات او الولاد علي الايميل ، وليه بيشعر برغبة كبيرة في التحدث لهم ؟

لأن دلوقتي الأهالي في أنفصال تام عن ابنائهم لا يشعرون بآلامهم ، ويحقرون من شأنهم ، ويقولون انهم لاينفعون في شئ ، وأنا من وجهة نظري أن الأهل هم اساس كل المشاكل في المجتمع ، وليس تحامل عليهم لأنهم لهم دور كبير في التربية ، والتربية مش انك تقعد تتكلم وخلاص وتعطي أوامر بل ان تسمع لأولادك ايضا ً ، وتحاول ان تحل اي مشكلة تقف امامهم ، ولكن ده مش بيحصل خالص .

يعني علي سيل المثال تيجي واحده تقول لمامتها انها بتحب ابن الجيران . تقول الأم انتي بتقولي ايه كويس ان ابوكي مش سامعك ، انتي عاوزه كسر رقبتك ، انا باين اني ماعرفتش أربي ، ده بدل ما تركز ِ في مذاكرتك تقعد ِ تحب لي . هي الأم في الحكاية ديه صح بس تعامل الام مع الموقف قمة الغلط ، لأن البنت بتعتقد انها صج وان أمها بتكرها ، وكان ممكن الأم تحاول تسمع بنتها ، وبعد كده تكلمها تقولها مثلا ً ده احساس طبيعي ، ولكن انت بتحبيه مثلا ً عشان الموقف بتاعه وكده .

لذلك لايجد الولاد ولا البنات ملجأ غير الشات .

لأنه بيجد في الشات البنت بتسمع له و هو بيسمع لها ، وسبب تاني انك اما بتيجي تخش الشات زي الياهوو يجي ولد يكلمك والعجيب انه اول سؤال انت ولد ولا بنت ان ولد يقفل علي طول ، وبصراحة ما اعرفش ده بيحصل مع البنات ولا لاء ، وده حتي بيحصل علي الأيميل مثلا ً انا عندي اربعين ولد واربعين بنت فيقوم الولد عامل ابير اوف لاين للولاد واون لاين للبنات والبنت العكس ، فالولد اما يجي يحاول يدور علي ولد يكلمه يلاقي كله اوف لاين ، ولكن فيه بنتين اون لاين طيب ما اكلمهم وهكذا .

وكمان عشان الناس بقيت تهتم بالشكل اكتر من الشخصية . وأي واحد او واحده مش حلوين الحلاوة الاسطورية نقول: " ده انا مش هكلمه يا عم ده شكله مش حلو وأكيد شخصيته هتبقي كده " . فبيشعر معظم الناس - لأن الحلاوة ديه نادر وجودها - انهم عاوزين يثبتوا ان عندهم شخصية كويسة ، فلا يجدون أنسب من الشات والنت للتعبير عن شخصياتهم .

ايه بقي الأضرار الي بتنتج عن الشات بين الولاد والبنات ؟

اول حاجة الوقت بيضيع كتير ، وكمان خش اي سيبر هتلاقي معظم الناس هناك قاعدين علي الشات ، وبيصرفوا فلوسهم كلها علي لاشئ .

وتاني شئ التعلق ، فالواحد بيشعر بالتعلق تجاه البنت اللي بيكلمها ، وعندما لا تدخل البنت في يوم يشعر الولد بأحتياجه الشديد لها ، ويشعر بأنه كالمدمن ، وأول ما يكلمه يقولها انتي ما دخلتيش امبارح ليه وكنت فين كل ده ؟ ويحس انها وحشته .

انه بيشعر بالوحده ، فالشات يبعده عن المجتمع والحكاية ديه كانت بتحصل معايا كل ما ابعد عن الكمبيوتر اشعر بالوحده وحتي في وسط اصحابي .

وكمان مشكلة كبيرة تانية انك تكون موجود مع اهلك ، لكنك قاعد علي النت فتنفصل تماما ً عن الدنيا من اجل الشات .

فيه مقوله بتقولك اذا رفعت الكلفة حدثت الائلفه يعني " اذا اصبح التعامل بين الولاد والبنات من غير حدود ، اصبح خلاص فيه محبه بينهم ، وده بيحصل نتيجة الدخول في الأمور الشخصية " ، وبعد فترة تقعد تفكر في البنت الي في الشات وتقول " ديه بنت خلقها كويسة جدا ً ، وانا اما اجي اتجوز هتجوز واحده زيها " ومع اختلاطك بكذا بنت بيحصل في العقل تجميع لكل الصفات الي هو شيفها ويجمعها في شخص واحد ويبقي ديه فتاة أحلامه او ده فتي احلامها ، وديه طبعا ً بتبقي صفات اسطورية مستحيل تواجدها .

وكمان المشاكل بتابع الولاد والبنات في الزواج ، يعني مثلا ً بتحصل مقارنه بين الولد بتاع الشات والي اتجوزته وتقول :

ده الولد بتاع الشات كان بيسمع اكتر ، ده الولد بتاع الشات كان بيتصرف احسن من كده ، مع انه ممكن يكون الولد بتاع الشاع بيشتغل البنت وبيضحك عليها لكي يؤثر علي قلبها .

قبل ما اقولك ازاي تبطل اقولك بتجربه بسيطه انك ازاي متعلق بالشات مع البنات والعكس ؟

بص ما تدخلش لمده اسبوع علي الايميل خالص وهتشوف بنفسك انك هتكون زي الي بيبطل سجاير ، والي هيقول في نفسه لاء ازاي انا ان عاوز ابطل هبطل دلوقتي طيب ما تبطل ولا هو كلام وبس .

وكمان شوف نفسك ان انت ترضي اختك تأخذ منك الايميل وتقعد تتتكلم مع ولد علي الشات .

جرب انك تتكلم مع اي بنت وامك قعده جنبك وشوف ايه الي هيحصل هل هتقدر تتكلم مع البنت عادي ولا هتبقي اكنك متكتف .

حاول تقيم نفسك ازاي انت بتفكر في البنت الي في الشات كام مرة في اليوم والكلام الي قالته أثر فيك ازاي .

ما هو الحل للتخلص من الشات بين الولاد والبنات ؟

بص حاول انك تبعد عن الايميل لأسبوع ، حتي تتخلص من اي تعلق بالشات ، وأول اما ترجع حاول انك ما تقضيش اوقات كثيرة علي الشات ، وانك اما تيجي تتكلم مع اي بنت ما تتكلمش معاها عن حياتها الخاصه ، بل حاول انك تتكلم معاها في أمور مثلا ً المنتدي الي انتم مشتركين فيه ، او في الدراسه .

وحاول انك تبحث عن مجالات بتحبها بتحب مثلا ً تاريخ حاول تقرأ فيه او تحاول تقرأ في كل المجالات هتحس انك كنت مكتف نفسك في دائرة صغيرة في النت ، وتلاقي ان النت ده حاجة كبيرة وهتستفيد كتير وهتفيدك الحكاية ديه في الثقافة العامة وفي ايجادك العمل المناسب لك .

الأعراض الجانبية لترك الشات بين الولاد والبنات ؟

ان دققت في السؤال هتلاقي مكتوب الأعراض وده دليل كبير ان الشات بين الولاد والبنات مرض .

نيجي بقي للأعرض ان مالقتش حاجة تعملها هتشعر بفراغ كبير .

بس تقدر تتغلب علي الحكاية ديه تاني بأنك تبحث عن معلومات علمية أو تاريخية أو اي حاجة ، وانك تحاول تتقرب من أهلك وتفهم هم بيفكروا ازاي . وتفتكر ازاي كنت بتقدر تفهم البنت الي علي الايميل حكايتك وتحاول انك تفهم والداك و ووالدتك مشكلاتك وانك محتاجهم .

واخيرا ً احب اقول مقوله وحده من ترك شئ لله أبدله خيرا ً منها .

جميع الحقوق محفوظة : لابو تريكة.